施洛食紅原因曝光　英足總突刪除停賽聲明

英超「默西賽德郡打吡」爆出4張紅牌鬧劇，利物浦領隊施洛完場後走去同球證奧利華握手，隨即被出示紅牌驅逐，令球迷睇到搲晒頭。英足總周四(13日)一度發出聲明，證實施洛因「侮辱」球證被逐，而且要停賽2場，不過聲明之後又被刪除，施洛使唔使停賽仲係未知數。

英足總曾發出聲明表示：「利物浦領隊施洛喺對愛華頓完場後，因為作出攻擊性、侮辱性嘅辱罵言論而被驅逐，佢會因此被罰停賽2場。」不過呢段聲明好快又被刪除，據《The Athletic》報道，足總仍未審閱球證報告兼未有決定作出咩行動，呢則聲明屬於錯誤。

英足總需要喺事發後3日內決定係咪作出檢控，目前施洛仍然可以領軍喺周日(16日)迎戰狼隊，如果之後真係被罰停賽2場，佢就無緣督師作客阿士東維拉同曼城2場硬仗，由於助教侯索夫同樣被逐，預計教練希汀加會暫代領軍職務。