東網電視
更多新聞短片
拉特克利夫受到唔少批評。(Getty Images)
曼聯新老闆拉特克利夫上場後，代替格拉沙家族管理足球事務，不過球隊成績未如理想，「拉爵」亦成為眾矢之的。呢位英國富商日前接受訪問，表示「唔知點解」會選擇收購曼聯股份，更威脅如果好似格拉沙家族咁受到球迷攻擊同滋擾，佢會選擇離開曼聯。
拉特克利夫接受《星期日泰晤士報》訪問，被問到點解要入股曼聯，佢話：「我絕對唔係為錢，我喺化學、石油、燃料等項目已經賺夠，老實講我都唔知點解(買曼聯)，以往買尼斯係好平，但法甲水平唔足以令我興奮。費格遜最初都提醒我，曼聯件波衫對所有人都好沉重，我加入後都老咗好多！」
對於球迷嘅抗議同批評，拉特克利夫就話：「格拉沙家族依家退居幕後，所以依家乜都由我去受，如果有一日我去到格拉沙家族受滋擾嘅程度，我就要重新考慮接唔接受到，或者要交畀其他人去搞。我依家唔帶保鑣出街，如果情況去到不能容忍程度，一切都唔再有意思。」
