【日系放送】2億春古馬三冠同杜拜香港搶客

日本過往有唔少具級數嘅中距離馬，上半年都會以杜拜賽事又或者香港女皇盃為目標，因為呢段世間國內只得5月頭一場3200米嘅春季天皇賞同6月尾一場2200米寶塚紀念賽，唔夠長力嘅馬匹(尤其是以2000米為首本)唔遠征，真係隨時半季企咗喺度。

不過由2017年開始，情況就唔同晒！因為討論咗一段時間，將產經大阪盃升格嘅問題，終於獲得JRA落實。4月頭喺阪神競馬場舉行嘅2000米二級賽大阪盃，下年開始將會正式升格成為G1。呢場賽事將會同春季天皇賞及寶塚紀念賽成為新嘅春古馬三冠。過往贏晒秋古馬三冠(秋季天皇賞、日本盃、有馬紀念賽)，日本產馬可以獲得2億Yen(約1500萬港元)，國外產馬就可以獲得1億Yen(約750萬港元)特別獎金，日後春古馬三冠都係會增設相同嘅獎金制度。不過大阪盃擺喺四月第一個禮拜舉行，真係隨時同香港女皇盃搶客。

另外，以往日本嘅兩歲戰線，雄馬就會以朝日盃未來錦標，雌馬就會以阪神兩歲雌馬錦標一決高下。不過同有馬紀念賽同日舉行嘅兩歲二級賽希望錦標，若今年參戰馬評分夠的話，來年亦將升格做G1。嘩！咁最佳兩歲馬獎項，咪終於唔使一場定生死囉。