【踩過界】「美麗」系周日殺入氹仔馬場

雖然近年有好多香港馬主，都放棄響隔離埠澳門養馬，不過凡事就總有例外，而近季響香港馬圈相當活躍嘅「美麗」系大馬主郭少明，今季除咗高價引入家族馬「美麗傳承」，力圖一圓打吡夢外，佢嘅養馬目的地，亦都重新將澳門納入版圖，嚟緊星期日，佢名下嘅「一樣美麗」，就會響澳門當日第六場賽事上陣。

對於郭少明嚟講，早年都有試過響澳門養馬，嗰時佢以自己名中「明」字為馬匹命名，好似「明冀」、「明駿」、「明艷照人」等，當然亦有用番「美麗」如「美麗至上」，事隔多年打正旗號將新馬改為「一樣美麗」，睇嚟佢都希望響澳門嘅養馬成績，一樣好似香港咁理想，而且今次佢隻新馬再唔係由前冠軍練馬師譚文就主理，而係支持另一位近兩季冒升甚快嘅王君適，當然係想有一番新景象。

至於愛駒周日首度上陣跑草地千五米，將會由黎家駒執掌帥印。