【谷閘猛人】中國乒乓天后張怡寧老公曝光

今朝天色良好，最適合郊遊，跑馬地馬場舉行七組草閘，有份出試馬嘅馬主大條道理到場，馬匹亮相圈頓時星光熠熠，分別有陳鈞洪律師睇「哈哈其妙」、珠寶大王黃崇耀睇「奪寶王」、理文造紙太子爺李文斌睇「包裝奇兵」、化妝品大王郭少明睇「美麗威威」、香港會計師公會前任會長方中睇「萬霸駒」等等，而最矚目要數前中國乒乓天后張怡寧老公徐威首度曝光。 《東網》早前影到張怡寧同囡囡喺跑馬地馬場睇試閘，原來佢早已與香港馬圈扯上關係，老公徐威名下愛駒「快樂魔王」喺第四組1200米閘由田泰安出試，直路有點內閃之下，以第七名過終點，似乎仍未習慣右轉，事關呢匹愛爾蘭四歲PP喺當地一場17匹馬角逐嘅賽事脫穎而出，喺嗰場1600米草地左轉賽事輕勝對手1.8個馬位，日後學到轉腳，前途一定無可限量。 值得一提，2008年北京奧運會日本選手福原愛曾被張怡寧打到喊，後者面無表情嘅扣殺實在太狠，後來被網民起咗個朵叫「大魔王」，徐威將愛駒命名為「快樂魔王」，相信係想帶畀太太張怡寧一世幸福快樂吧！