【星座玄學】巧合！90後麥偉利係一頭河東獅

香港賽馬史中，南非騎師極具影響力，綽號「馬場警察」嘅雷誠堪稱先驅，率先來港出任簡炳墀馬房主帥，為鄉里打造新大陸，打後再有高雅志、史卓棟、馬佳善、、霍達、馬偉昌、韋達同史科菲父子等好手來港搵食，個個都耳熟能詳。

講到今期最灸手可熱嘅南非騎師，當然係日前抵港嘅後生仔麥偉利，呢位年僅20歲嘅超級小鮮肉早前喺南非出賽，曾於一日內勝出三項一級賽，咁都未算巴閉，呢位90後騎師未曾在港出賽，馬會提早將佢份合約延長至馬季煞科日，似乎睇好佢會有一番作為。

麥偉利出生於1996年8月24日，生肖屬鼠，屬獅子座，鄉里苗禮德聽日提供「川河領駒」同「日東昇」佢執韁，巧合地兩駒馬名分別有「東」同「河」，河東獅吼有幾惡，人夫才能深切體會。

值得一提，獅子座男士不會打冇把握嘅仗，亦不甘處於被動，今晨麥偉利親自替「日東昇」同「川河領駒」喺內圈踱步加課，兩駒都係佢首朝過檔，人馬提早溝通都係好事！