【巨鷹不再拍翼】剎那光輝 竟花光所有運氣！

一剎那光輝未必代表永恆！呢句說話用嚟形容出爐葉森打吡盟主「巨鷹拍翼」就最適合，因為佢嘅事業高峰就只限於葉森打吡夥拍白堅爆冷一刻。呢匹父系出自01年葉森打吡馬「人人為我」嘅三歲雄馬，早兩日於愛爾蘭打吡不敵同出自岳伯仁馬房嘅廐侶「卡帕利島」只得第三後，賽後即被獸醫被發現籽骨骨折要即時退役，出道至今只跑咗六場，競賽生涯就宣告玩完，認真可惜。睇嚟葉森打吡真係用咗佢一生嘅運氣。

岳伯仁今年雖然又一次包辦英國同愛爾蘭打吡孖寶，只不過「巨鷹」唔再「拍翼」，相信對佢下半年大賽嘅部署都有幾大嘅影響。而更慘嘅係，佢旗下嘅歐洲馬后「各管各」自五月勝出二級賽摩爾斯橋錦標後，一直備受健康問題影響，預計起碼秋天先可以復出。可惜岳帥早前向當地傳媒標示，馬后康復未如預期，要畀多個月休息期佢然後再觀察，復出日期都暫時係白紙。嘩，兩大台柱，一隻退役一隻重創，都咪話唔閉翳。