【腦筋急轉彎】蘇偉賢搵意國型男馴服雄獅

雖然「雄獅動力」上季來港至今仲未有表現，十二戰只喺今季響泥地千二米跑過第三，但蘇偉賢對呢匹馬未盡放棄，畢竟質新馬勝在後生，相信只係等待時機成熟，Chris哥仲係睇好呢匹低班馬可以低位反彈。

今次用到李寶利騎呢匹「雄獅動力」，話唔定就係黃金機會，首先騎練今季首度合作，以騎者近期手風轉順，當然期望可以帶嚟旺氣同新鮮感，為呢匹沉睡嘅「雄獅」，帶來更多朝氣，而且今仗初次增程跑到去千八米，亦有變數存在。

對於阿Chris今季嘅部署，相信佢都認同將「雄獅動力」歸入去泥優於草一類，今次增程出擊，睇嚟佢就好有期望，特別係今朝由李寶利最後試跑，全程響機坪範圍打點，操完等接馬，只見佢上前摸馬鼻輕拍馬頸，對於呢匹五班馬愛護有加之餘，仲同李寶利傾咗好耐，且看於練者悉心部署下，能否為呢匹「雄獅動力」帶來突破。