【方嘉柏2.0？】姚浩豐假已清 升任父親馬房副練

記憶所及，香港練馬師搵個仔做自己馬房副練，除老摩同大摩外，應該只係得已故嘅方祿麟先生，佢當年做練馬師時一手提攜孻仔方嘉柏，並私下聘小方為馬房助理兼副練，老方退休，小方翌季獲練馬師牌，大部分馬匹齊齊過塘，只係名字上由方廐變柏廐，實際上係薪火相傳。

嚟到18/19年度馬季，姚浩豐見Board成功，正式由徐廐領班升為副練，並調往父親姚本輝馬房，繼方氏父子後，成為另一個由父子組合領導嘅馬房。至於姚浩豐能否成為小方2.0就言之尚早，然而豐仔近日清完大假，並與父親齊齊落場打點，絕無偷懶，今晨齊齊坐喺烽火台睇操，兩父子個樣已經好相似，估唔到連舉鏡神態一樣咁有氣勢！