【夠晒誠意】老苗急住回饋兩位開鑼常客

馬圈愈嚟愈少外籍馬主，論資歷布魯士都可以講係中流砥柱，而近年佢同太太仲全力支持苗禮德，兩人所養四匹馬，全部交晒畀佢打理，而響明日賽事，「龍城勁將」同「龍城猛將」一對同主馬，更加係攜手分途出戰。

事實上「龍城」系馬上季表現，唔計新到港嘅C55，其餘三匹都上過陣，自從「龍城猛將」響上季初10月14日贏過馬之後，其餘兩匹「勁將」同「勝將」都只係得位置交代，相信以布魯士對老苗嘅支持程度，全季得1W交代，自己都過意唔去，，今季仲加多匹生力軍，所以首戰把握馬匹勇態，已經急不及待派兩駒列陣。

睇番資料，「龍城」系近年都係苗禮德開鑼日常客，昔日明星馬「龍城勇將」，分別響上季同大前季嘅先頭部隊，而響2015/16年度馬季，「龍城勇將」響史卓豐胯下於開鑼日贏馬，如今「勇將」退役，新季有「勁將」同「猛將」接棒，分別配上利敬國與黃俊於首戰出擊，老苗安排兩飛叫胡，交代心態係點，大家都應該心裏有數。