【離港有因】蘇兆輝入主李城已故班主賽馬集團

千呼萬喚始出來！巴西籍三屆英國冠軍騎師蘇兆輝，早前趁停賽期間飛往英國洽談主帥合約，佢嘅新波士終於揭盅，就係已故英超球隊李斯特城班主維猜旗下嘅King Power Racing Co Ltd.。

其實此賽馬集團與香港馬圈算係有啲淵源，去年12月香港國際賽，派出「小刀鋸木」出戰香港一哩錦標，最後跑第11名。

維猜除了係足球愛好者之外，亦好熱衷賽馬運動，前年開始正式於英國馬圈大展拳腳，經過兩年擴闊版圖，目前集團名義擁有60匹養馬量，而絕大部分都係由包義定、白祈達與向禮倫三位當地名牌練馬師負責訓練及管理。

蘇兆輝今次將與King Power Racing Co Ltd.，簽下一紙為期兩年的主帥合約，King Power仲係泰國著名免稅店品牌，亦有涉獵酒店業務，真係百足咁多爪，家陣蘇兆輝有呢條水喉射住，有運行呀！

而在24號告別戰後，蘇兆輝便會飛返英國履新。雖然蘇兆輝將要暫別香港馬壇，但他表示不會錯過來港策騎的機會，待來年英國馬季結束後，將會如常重臨客串策騎，而他更笑言世事難料，不排除兩年約滿後，或會選擇來港長駐發展。