【抹完鼻血重出江湖】潘頓正式接觸李丞責愛駒

玄學家李丞責去年首度中籤做馬主養馬，豈料愛駒「歡樂從心」於12月2日首度上陣跑包尾不特止，仲要流埋鼻血，搞到李師傅與港姐冠軍太太劉倩婷當時相當冇癮，而不幸中嘅大幸係隻馬勝在年輕，四歲仔抖番1個月左右，於1月8日起就投入番正式操練，期間操練完整，上月5日由梁家俊試咗課800米草閘，拍實子彈快馬「亞馬寶寶」過終點，兩駒已遠遠拋離群駒五個Length，鬥心完全凸顯，難怪潘頓生滋貓入眼，立即主動搵徐雨石索騎，而周日此駒將續爭三班田草1000米直路賽，抽14檔馬迷握手位起步。<br/><br/>今晨排位朝，「歡樂從心」首度由潘一哥接手操練，與廐侶「雷公鑿」出草地拍跳考驗，望真啲李師傅愛駒嘅後庄肌肉番晒嚟，有晒托弗訊號。課後，石哥第一時間撲去機坪接馬，兼且追問潘一哥第一身意見，搏殺意欲好明顯，即管睇吓「歡樂從心」抹乾淨鼻血後能否重新振作。