【R.I.P】一代馬后伏特加離世 終年15歲

早幾日講過日本向來盛產馬后，其中一位最為馬迷熟識肯定係累積7場G1冠軍嘅「伏特加」，可惜日前傳出壞消息，就係呢匹馬后上月中喺英國準備參與配種時，發現右後腳骨折，即使接受手術治療，可惜近日一對後腳發現蹄葉炎，最終因傷患嚴重被迫人道毀滅，終年15歲。

「伏特加」服役期間成績突出，並是自第二次大戰後首匹以雌馬身分勝出日本打吡嘅佳駟，同時曾兩奪安田紀念賽，亦贏過一屆日本盃、秋季天皇賞，並兩度登上日本馬王寶座。不過，唯一可惜是「伏特加」曾三度遠征杜拜，可惜始終無功而還，應該是其服役生涯唯一美中不足之處。

另外，曾夥拍「伏特加」捧走2009年日本盃的日本一哥李慕華，日前亦喺自己社交網站撰文紀念此匹一代名雌，多謝「伏特加」為佢帶嚟呢項一級賽。