【嘉琦BB拍番套?】那些年5齣必睇賽馬電影電視劇

以賽馬為主題的電影及電視劇，香港都拍唔少，小編身為80後，睇住TVB長大，當然睇過1993年黃日華、陳秀雯主演的《馬場大亨》，仲記得劇中三匹馬「發夢王」、「夢想成真」同「大夢想家」添，而2001年馬浚偉、蔡少芬、趙學而主演的《勇往直前》就記憶猶新，我哋前女騎師余詠詩亦有份出演。

至於電影方面，1997年劉青雲、吳鎮宇主演的《高度戒備》，入面有打劫馬場金庫的喬段，都成22年前，再之前應該係《運財童子》，劉青雲、周文健、吳倩蓮主演，道盡升斗馬迷的百態，賭馬賭到玩竊聽，夠晒抵死。另外，不得不提前輩驃叔的兩部經典，1994年《馬神》同1978年《馬場風暴》，大爆馬圈黑暗內幕，都係必睇推介。唔知大家覺得最難忘同最好睇係邊部呢?

電影

1.馬場風暴(1978年)

講述董驃飾演的練馬師，如何走上毒馬之路，最有印象是示範將蒜頭塞入雌馬尿道，令馬匹感痕癢，影響出賽表現，結局驃叔在機場被警方拘捕，是少有做反派角色。據悉電影在馬來西亞馬場拍攝，戲中亦可見到跑馬地馬場當時盛況。

2.馬神(1994年)

講述馬圈造馬案，溫兆倫飾演的練馬師，如何在驃叔的協助下，與反派練馬師周旋，同樣大爆馬圈分餅仔、毒馬等黑幕。

3.運財童子(1994年)

劉青雲飾演爛賭馬迷，為了贏錢不惜在練馬師宿舍裝偷聽器收貼士，又輸到爭落一身貴利數，最後被迫用婚姻作賭注，將所有錢押在一匹大冷門「運財童子」。電影場景集中在茶餐廳及投注站，道盡不同馬迷的心態及眾生相，非常貼地。

電視劇

4.馬場大亨(1993年)

韋家輝監制，有神劇《大時代》的風格，黃日華飾演的李大有，是一位瘋狂天生追夢者，本經營收數公司、卡啦OK，及後涉足賽馬業，經過多重難關後，終開設馬場，達成「馬場大亨」的夢想。

5.勇往直前(2001)

典型小人物奮鬥劇，講述熱愛賽馬的馬浚偉，如何由馬伕、騎馬人做起，最後成為一位出色的練馬師。