【其利斷金】「非凡哥」麥長青倒塔咁早陪老友睇谷閘

數年前於TVB電視劇《巾幗梟雄》飾演「非凡哥」一角而爆紅嘅麥長青，自從淡出幕前，一樣做到風山水起，近年除咗同朋友喺香港夾份開冰室，又喺澳門做埋馬主，縱使經常港澳兩頭騰，但每次見到佢，一樣咁精神兼有活力。

今朝快活谷試閘，麥包喺七點半就嚟到現場，頓時成為全場傳媒焦點，雖然佢冇喺香港養馬，但勝在老友多，見佢全程陪住「其利斷金」馬主之一蘇智恒，原來呢匹由葉楚航訓練嘅新西蘭3歲PPG是日有份出試第三組1200米草閘，並由史卓豐首朝過檔，人馬全程緊靠馬群，居中而回，走勢令人滿意。

課後，麥包同埋蘇先生一齊去沙圈旁邊接馬，繼而聆聽史卓豐詳細匯報，結合埋航哥專業意見，大家都笑住離場，相信距離出賽威威日子應不遠，「其利斷金」前仗曾由韋達於田草1400米剷入一席巨冷第三，能力早已證明，且看豐豐能否把握韋達寶藏！