【風水輪流轉】意國型男令和第一 地表最強慘罰停賽

2019年NHK一哩賽：

https://bit.ly/2JiAIvd　

人人都話去日本搵食好。好似近年長駐當地嘅法國好手李慕華，最近就連贏、櫻花賞、皐月賞同春季天皇賞三項G1，堪稱荷包腫脹。相反另一位外籍騎師杜滿萊表現就完全被比下去。事關意國型男近期手風認真麻麻，2019年頭四個個月只收穫一場G2，同地表最強完全冇得比。不過，隨住五月一號日本踏入令和新時代，意國型男亦終於威番次。尋日於東京競馬場舉行嘅NHK一哩賽，杜滿萊策騎去年兩歲馬Admire Mars，後上一條直路殺晒，成功擊敗分別由石橋修同艾道拿操刀嘅Cadence Call及Catedral，贏得令和年代嘅首項G1。

仲記得早前皐月賞，杜滿萊就係因為要騎Admire Mars，將另一實力馬Saturnalia嘅帥印讓予李慕華，而後駒最終成功贏馬而回。今次成功補中，總算補償番意國型男之前嘅損失。相反，李慕華今次就冇咁好彩。騎者夥拍櫻花賞盟主Gran Alegria出戰呢項賽事，原本跑獲第四名，但因為直路外閃阻及他駒，被降為第五不特止，佢仲因短期內兩犯不小心策騎而被 重罰停賽16日，連月尾打吡都跑唔到，呢鋪咪叫風水輪流轉囉。