【當年來港冇料到】士別三日 連達文東瀛又抬錢

2019年京王盃春季盃

25歲澳洲年輕好手連達文四年前曾短暫來港客串四個月，當時佢合共只贏得5W，並冇令人留下深刻印象。騎者其後返回澳洲策騎，近年頻頻揚威大賽，果真係士別三日，刮目相看。而最近佢趁住澳洲休季前往日本獻技，表現繼續神勇。

繼前周夥拍Mer de Glace攻下G3新潟大賞典，贏得個人日本首項分級賽頭馬後，尋日喺安田紀念賽前哨戰1400米G2京王盃春季盃，連達文策騎高多芬旗下馬「倫敦塔」(Tower Of London) 後上擊敗武豊嘅Linate及戸崎圭太嘅「火之呼喚」(Logi Cry) 贏馬，客串三個禮拜已經收穫兩場重賞頭馬，認真犀利。

值得一提，「倫敦塔」雖然自去年四月勝出雅靈頓盃後，超過一年未再贏馬，但今場佢喺連達文胯下成功造出1分19秒4破場地紀錄時間，且看去到正本戲安田紀念賽人馬再度合作，有冇機會畀到馬后「杏目」多少威脅？