【最強母親】香港人擁有的凱旋門冠軍：海都市

今日母親節，我哋《東網》馬經先祝各位母親身體健康、兒子生性、開心快樂。母親節難得冇馬跑，不如講吓賽馬世界有邊一位媽媽特別犀利啦。大家咪以為香港好少馬女服役，就以為雌馬唔重要，事關純種馬屬於母系社會，用作競賽嘅純種馬出世後就會跟隨母親成長，重要性可見一斑。

至於喺近廿幾年賽馬世界其中一匹最出色嘅雌馬，竟然同香港人有關，主角就係由崔寶榮擁有嘅「海都市」(Urban Sea)喇。呢匹馬女服役期間取得8冠3亞3季，固然唔簡單，更喺1993年捧走法國凱旋門大賽，令人拍爛手掌。不過，估唔到轉任種馬後，作為媽媽嘅「海都市」成就更大，事關先後誕下「天文學家」(Galileo)同埋「海都之星」(Sea the Stars)兩匹多項一級賽冠軍，前駒贏過英國葉森打吡同埋英皇錦標，「海都之星」就捧走葉森打吡同凱旋門大賽，呢兩匹囝囝目前更成為歐洲最出色種馬之一。

可惜，「海都市」喺2009年誕下最後一匹子嗣Born To Sea後不幸離世。不過，崔氏家族近年有「海都名門」成功接棒，呢匹4匹馬女乃去年凱旋門大賽亞軍，爸爸正正係「海都之星」，換言之亦算係「海都市」孫女。如果「海都名門」遲啲加入配種行列，隨時成為另一位最強媽媽。