【突發!】騎師蔡明紹走出大埔公路幫手趕狗

20190624
東網電視
更多新聞短片
蔡明紹(紫衫)與穿梭巴士女司機一齊於馬路上驅趕唐狗。
今朝晨課十分順利,全朝都冇馬走甩,練馬師、騎師及馬伕等總算可以準時收工,不過馬場外卻發生一宗走甩狗事件。事緣八點半鐘,一輛穿梭巴士在香港賽馬會通訊及科技中心上落客後,左轉往九龍方向嘅大埔公路沙田段交接處時,突然有三隻目測一至兩歲嘅唐狗肆無忌憚擋在車前,猶幸穿梭巴士早有預備,慢慢停下來。
鑑於當時正值上班繁忙時段,公路上出現車龍,車速不算快,女司機與一位乘客連忙落車試圖作出驅趕,可惜未能成功,仲上演一幕「阿崩叫狗,愈叫愈走」,其中一隻唐狗BB逃至公路旁嘅坑渠徘徊,景象恐怖,穿梭巴士身後嘅私家車司機見狀亦落埋車幫手,呢位好心人原來係剛剛收工嘅騎師蔡明紹,佢過千磅嘅馬都舞得掂,加上亦係養狗之人,果然三兩下手勢就成功驅趕其中兩隻唐狗BB返回路旁,總算令現場交通回復正常,另外嗰隻渠邊嘅唐狗BB已不知所踪了。
值得一提,蔡明紹對上一場頭馬要數到5月11日嘅「鑽得勁」,守齋個半月,係時候搶下Fo。周三賽事,騎者七匹坐騎中,有五駒排4檔以內,果然好心有好報,其中新勝馬「鑽得勁」轉爭另一勝途谷中1000米,排2檔起步,機會樂觀。