歷年搞嘢馬名大曬冷！

好多馬主改嘅馬名，真係千奇百趣，有啲一見到直情會「傑」一聲笑咗出嚟，好似早幾年福仕團體隻「十二門徒」，其實係叫「硬漢一條」，但之後見唔對路，馬主先要求改名咋..而現役馬之中，有咩馬名搞鬼？葉思貝、許坤華兩公婆嘅「邊個邊個」、「嘜誰嘜誰」梗係榜上有名喇，當大家直路聽見賢仔話邊個邊個、嘜誰嘜誰衝緊上來，咁究竟係呢隻定還是其他馬衝上嚟先哈哈哈....仲有霍利時馬房的「鑲白旗」，未跑已舉白旗...另外仲有一大堆玩食字好似「心興德仁」、「易勝相吸」、「步履如飛」、「大灣駒」嗰啲...見到都真係擰擰哋頭呀喂！

不過講開歷年搞鬼馬名，其實好多已經成為馬迷共同回憶，遠古嘅當然有「根州童」(唔好讀歪)、「廿一點」、「龍潭老鼠」(英文名Long Time No See)、「出口商人」(出口傷人)、「巴里舞士」(包你無事)、「美國生菜」、「格古樂」、「杜拉格斯」(龍珠主角名)、「紅藥水」、「木瓜二世」、「百發百」(爭個中字)、「豬小姐」、「祗是激」(Cheese Cake)、「凍冰冰」、「根本英俊」、仲有「金腰帶」(殺人放火？)、「冰火」(不解釋)、「火燎腚」(火燒後欄)同埋「談何容易」(辛苦贏一場但被告甩！)、澳門馬更有馬叫「書籍」、「麗書」同「硬中硬」！講起都真係笑足半日喇。