老婆晨課突擊檢查 韋達六點半「順」利過骨

由騎師轉職練馬師嘅韋達，每日都有新聞咁滯，不過都係離唔開有咩馬加盟，同埋邊位騎師要埋佢堆。不過今朝就有啲唔同，喺六點半鐘，韋達太太突然以一身街坊裝，由宿舍方向行嚟烽火台，見佢咁急殺入嚟，唔會突擊檢查老公啩！

向來冇桃色新聞嘅韋達，當時都係做番自己，策騎「順意寶」喺內圈踱步，課後鞍上人喺機坪遇見太太，專車接送就梗，於是兩人乘哥爾夫球車返奧運馬房，適逢今日下午四點，韋廐會舉行季前拜神儀式，切豬呢家嘢咁重要，話唔定韋太今朝緊張得滯瞓唔着，早啲嚟打個白鴿轉啫！