田泰安缺陣 利敬國話馬場保特另有其人？

今個禮拜六沙田馬場舉行季前嘉年華開季試閘樂滿FUN，重頭戲當然係一年一度嘅騎師競跑，有「馬場保特」之稱嘅田泰安，自從參加騎師競跑以來幾乎未逢敵手，但由於今個禮拜六、日佢要遠赴日本參與世界超級騎師大賽，究竟今次騎師競跑會由邊位騎師勝出，究竟邊個可以上位做馬場新飛人？

如果大家唔太善忘，應該記得舊年嘅騎師競跑，幾乎被利敬國成功偷雞，可惜呢位南非騎師終點前撻低，就連手上嘅馬公仔都跌埋，結果被DQ取消資格。不過，既然今年冇咗「馬場保特」田泰安，利敬國自然成為大熱門，但呢位今朝先至回防嘅騎師，卻大爆「馬場保特」另有其人，就係今朝同佢一齊開工嘅同鄉兼老友杜美爾，佢仲好謙虛話自己跑得唔夠田泰安快，但杜美爾應該仲快過安仔。咁究竟杜美爾係咪真係咁犀利，禮拜六嘅騎師競跑一定要睇真啲喇。