【嚇死寶寶】馬王美麗傳承草地直路一度收停

今個星期日，馬王「美麗傳承」將於季內第二次上陣，並出戰第八場國際二級賽東方表行沙田錦標(草地1600米)，唔理贏幾遠都好，只要率先衝線，就可締造在港第17W，隨時可於季內打破「精英大師」保持十四年嘅舊紀錄(18W)。

大摩今朝特登向馬會預約，要求於6時15分開放草地跑道及開大燈，給予「美麗傳承」及同場廐侶「鷹雄」先後進行快操，情況猶如去迪士尼買定Fastpass，事關今晨6時45分，草地跑道一樣開放畀馬匹操練，相信大摩係唔想馬王受其他馬匹騷擾，冇心插隊嘅。

當一眾傳媒正期待「美麗傳承」轉彎入直路跳到呯呯聲之際，馬王卻突然於直路200米被鞍上人Romain收停，的確當堂嚇一跳，然後得啖笑，皆因馬王已於對面直路1800米起步兼完全快跳，事後一眾傳媒才恍然大悟，只能觀看大摩踩單車迎接「美麗傳承」及「鷹雄」，事實上練者亦冇話過兩駒會喺公眾席前面草地直路進行快試，惟操練總算順利完成，粉絲們繼續打氣吧！