【開心馬場】韋小寶施展追女術

國際賽之前繼續有主題賽事日，上個月有男士煲呔日，今次就輪到婦女銀袋，各位女士有機會用香港少戴嘅帽飾襯衫，到時衣香鬢影，男士們都大飽眼福！我都配合主題揀咗條靚靚連身裙，係咪好期待呢？睇番婦女銀袋賽，上季由「馬克羅斯」勝出，不過睇佢最近試閘末段要騎，而「時時精綵」只能追入第四，原來近兩季「時時精綵」初出都唔上名，如果成為全熱門要小心處理喇！

不過告東尼又點只呢兩粒彈藥，第六場「加州議長」季內兩次上名，不過前次陳嘉熙直路尾段畀人夾到發揮唔到，上次換巫顯東出閘又畀人夾惟有留後，全程外置蝕哂位，都可以發揮超強後勁狂追入Q，今次換上硬淨嘅田泰安，主要對手「載譽歸來」上次全程貼欄大勝三個馬位加12分咁多，今次繼續成為熱門，即管敲吓「加州議長」挑戰吓佢！

除咗「加州議長」之外，第二場田泰安亦接手上次由小將策騎嘅「韋小寶」，繼續挑戰四班1000米途程，上仗步速唔快都追入第三，今次有「自由旺」同「極爽」等快馬，初出馬例如「嘭嘭聲」同「超額認購」都有前速，預計步速偏快，「韋小寶」應該更好追，希望今次坐正啦！