日本客串兩個月 希威森頭馬多過香港6倍！

究竟係香港太難搵食，抑或日本根本就係海外騎師天堂？都係同一個希威森，竟然有咁大分別！貴為南非冠軍騎師，呢位仲未夠23歲嘅後生仔，今季決心來港闖一片天，點知天氣不似預期，一直都搵唔到條贏馬鎖匙，支持又唔多，結果喺香港客串半年，合共出賽251次，只得3W，勝出率係可憐嘅1.2%，累積獎金只有736萬，因此佢決定唔留喺香港，反而選擇去日本闖一闖。

雖然首次來港做公司騎師嘅經歷唔算成功，但估唔到去到日本，希威森反而好似開咗竅咁，啱啱呢個禮拜係佢東瀛之旅嘅尾聲，禮拜六先喺東京競馬場連中三元，兼且夥拍三歲馬Authority捧走2400米二級賽青葉賞，而喺尋日佢亦順利起孖。總結今次日本之行，希威森呢短短兩個月贏咗19W，足足係佢香港嘅6倍頭馬有多，亦有兩場分級賽頭馬，勝出則有12.7%，累積獎金逾4.55億yen(約3200萬港元)，絕對係大豐收。

另外，睇返希威森喺日本啲頭馬數據，有7場喺2000米或以上嘅途程取得，莫非佢係一位長途好手，所以喺香港生存唔到？