【蹄聲妙影】塵封十三年專欄 先撐校友蘇狄雄

《東網》馬經嘅讀者有福了！呢個塵封十三年嘅專欄重出江湖，本人會抽絲剝繭一啲話題性嘅馬圈動態，滿足吓好奇心之餘，亦可畀大家喺投注前多份參考，先旨聲明，冇話包中㗎！

首先，英雄莫問出處，本人全名筆劃太多，講完你晏晝實唔記得，不過有樣嘢很肯定，我睇日出多過你睇日落，畀面就叫東星。孭得起呢個名，固然係游泳好手，喺呢個英雄地游嚟游去，秘聞真係見唔少，尤其晨操影影埋埋咁多禁相，冇乜機會「出街」，依家搭棚起咗個小欄目，可以開心Share，未來會不定期發文，藝術家脾氣嘛！

靈感嘅嘢話嚟就嚟，蘇狄雄騎多兩個幾月就掛靴，傳聞七月會去大衛希斯度做騎馬人，為升副練舖路。不過Ben仔係我中學師弟就係鐵一般事實，雖然當年「薯」不認識，但相信都畀訓導主任捉過頭髮過眉，都算共過患難，絕不希望佢匹掛靴馬，係耐到上年10月30日快活谷贏嗰匹「大師級」。

至於今期日賽，馬會讓路畀母親節，跑禮拜六，初步睇好Ben仔匹「晉神」，呢匹馬原來與「大師級」同父，有冇咁橋，今次減夠兩分落到四班跑，泥地未掂過，績都唔使刨，純撐校友！

初步提供:

第一場「春風得意」

第六場「晉神」

■東星