居高臨下的父子 勢成「全日」焦點

俗稱烽火台的練馬師觀操台，練馬師舉鏡的鏡頭見得多，似乎冇乜說服力，今朝有個鏡頭非常吸引。六點四十分咁上下，方嘉柏偕同孻仔Ronan在烽火台二樓露台，同時以一對居高臨下的眼神，吼實兩匹從隧道底步至的馬匹，分別係「兩全其美」同「日日靚」，畫面所見，兩父子睇到目不轉睛，直至兩駒起步，才敢轉位睇拍跳，有晒搏殺手影。

周三賽事，兩駒同樣有份列陣，其中季內多次臨場獨贏着啡格嘅「日日靚」，至今仍未入過圍，不過接二連三俱輸近，今戰初跑谷草，話唔定可見真章，且看能否助捧場客收復失地吧！