希斯到咗香港喇 馬會視像訪問大爆料！

大衞希斯下季就會再次來港開倉，早前馬會CEO應家柏曾透露呢位澳洲練馬師將於今個月來港，為開倉一次做好準備，而佢原來日前已經嚟到，目前正接受14天家居隔離。不過，即使依家未可以去馬場同埋馬房，馬會已經透過視像通話同希斯做咗一個訪問，問吓佢再次來港嘅心情同埋新季期望。

希斯就話自己心情唔算非常興奮，事關已經第二次來港開倉，但佢都話非常熱切期待馬房工作。另外，希斯亦有提及馬王「美麗傳承」加盟，佢話首先要多謝郭少明家族嘅支持，事關呢匹一哩王者喺澳洲無人不曉，今季目標當然係年底國際賽，但如果呢匹馬王未能回復水準，亦會安排退役。

除咗「美麗傳承」，希斯亦有提到三匹即將來港兼且令人期待嘅新血，當中兩匹來自「包裝」系賽駒，分別係Shadow Hero(馬會前譯「影子英雄」)同埋Master Montaro，後駒兩出兩捷姿態突出，希斯都話係一匹極具潛力嘅馬，但是否可以晉身一班，則仲有一段路要走，而Shadow Hero已經係兩項一級賽盟主，當然以大賽為目標。

另一匹新血則同樣來自郭少明家族，就係四戰全勝嘅Talladega，呢匹主要喺西澳作賽嘅馬匹，視馬主視為下季爭香港打吡嘅武器。