利敬國重返南非策騎 贏馬賀29歲生日

四月嗰陣，利敬國被馬會撤回公司騎師牌照，事發突然，震驚香港馬圈。隨後騎者亦都喺社交平台回應事件，字裏行間亦希望未來日子能夠重返香港策騎。低潮時期總會過去，利敬國已經重返南非繼續策騎。

而喺尋日(29日)，南非凱尼沃斯馬場復賽，並舉行咗9場賽事，當中利敬國策五駒上陣。騎者喺第六場一哩賽策騎ELUSIVE FORTUNE贏馬，呢隻ELUSIVE FORTUNE抖咗107日再次上陣，久休果然有料到！

而喺其他場次，利敬國亦都獲得一亞一季，成績都算唔錯。今日係佢29歲生日，呢場頭馬賀生日，相信騎者都好開心喇！