【戰況R8】退役馬新力必 返澳洲交大摩訓練

莫雷拉真係會宣布投降嗎？雖然佢今日憑「禪勝寶駒」食頭胡，但潘頓第七及第八場反擊，憑「天生一對」與「新力寶」起孖，加上雷神下個賽日停賽，剩番兩個賽日要追到潘頓，真係難度極高。講番今日泥地跑道形勢，之前兩場頭馬都係一放到底，「新力寶」亦唔例外，練馬師大摩話此駒降到三班跑好有利，加上今場有1檔幫手，唔使耗力搶位已經放到頭，所以贏出好合理。馬主黃良柏同埋哥哥喺佢開倉早前已經給予支持，如今再合作贏馬當然開心。

至於黃良柏話由1986/1987年度馬季開始與大摩合作，已經30幾年，佢第二匹名下愛駒已交畀大摩訓練至今，成績大致上都唔錯，而大摩離港在即，兩人合作可謂好頭好尾。至於最難忘嘅馬，首推哥哥嘅「有性格」當年贏打吡及大賽。另外，上季引入嘅「新力必」因為脹筋關係而退役，運返澳洲休養後，目前健康好轉，將會由大摩喺當地重新訓練。

今場跑第二名為呂健威、雷神合作嘅「錶之銳」，「勝賢」沿欄跑第三，第四名為「天地人」。

第八場賽果：3-5-12-9

組合獨贏3揀1賽果：A1(最後賠率1.4)