歷年大單未盡全力策騎 你最有印象係...

香港馬圈咁耐以來犯天條者為數不少，今日同各位講講最經典的幾位，一講人名一講單事件，相信咁上下賭齡嘅馬迷，一定有印象，分分鐘仲有份買、媽媽聲添呀！

白德民-1993年11月28日，「神父」白德民在港策騎蘭尼馬房的「多多彩」，最後一匹入直路，去到最後二百大力拉慢，最尾跑第5輸兩個馬位，騎者換來停賽9個月！

蘇利雲-1996年騎梁錫麟馬房灰馬「天岸」出戰谷一哩，沿途包尾直路大波勾留到頭Fing Fing仲未騎，結果「天岸」係狂追第6輸不足兩馬位，蘇利雲被判未盡全力策騎，停賽11日。

鄭雨滇-前華將一哥曾四度觸犯天條，包括四駒「幸運才子」、「城中話題」、「軍駒」及「星光勇將」，一個騎師四度觸碰紅線相信係紀錄！最終鄭雨滇因一匹內欄想上唔上的「星光勇將」被狂罰25日，加埋電話門事件，鄭雨滇在港策騎生涯劃上句號，之後傳鄭到英國繼續策騎生涯。

賴維銘-當年一匹「青山之寶」未盡全力，嚴重到要停牌3個月，後經上訴減刑至停賽28日；反而上年賴仔策騎葉廐「贏馬神器」快放第3再犯天條，但獲馬迷一面倒力撐，最終雖然受罰10個賽馬日，但競賽小組卻罕有設追溯期，變相賴仔不用坐馬監，不過騎者很快以私人理由交還牌照。

巫斯義-2015年1月4日騎賢廐初出馬「精彩鬥士」一路包尾，直路在馬林中留到彈吓彈吓，之後施施然拉出外欄作有限度推騎，呢場老巫最終被罰停賽15日，算得上是老貓燒鬚。「精彩鬥士」次仗換莫雷拉大熱即補中，再出更在香港經典盃一級賽只輸鼻位跑第2。

蔣嘉琦-小組裁定佢未盡全力策騎「上利多」，停賽7個賽馬日，蔣嘉琦當時向傳媒表示研訊時沒有認罪，而此馬走勢亦一向不規矩。翌季此位女將以手傷為由交還牌照。

沈拿-數近年最大單拉馬事件，一定係意籍沈拿騎何良匹「與龍共舞」。2019年11月17日「與龍共舞」出戰二班千八，在300米至200米一段途程，沈拿係完全冇作有力度推騎及用鞭，結果騎者畀罰12日之後上訴減刑到10日，但之後畀不獲續牌。事件之後「與龍共舞」拉倉到方嘉柏馬房，一口氣贏四場兼摘下G3，咁嘅輝煌戰績，證明冇判錯沈拿喇！