【余詠詩廿載圖輯】將青春奉獻給老苗 新季再做副練！
20200720
東網電視
更多新聞短片
今日升為賀賢馬房從化副練嘅詩妹余詠詩，終於做番以前同一個甫士位置，大家都戥佢開心呀！
余詠詩97年正式在港出道，首匹頭馬為安哥匹「進寶招財」，在馬背馳騁多年後，到00年掛靴，收山當日梁定華仲畀隻1.7倍熱門「飛魚王」佢贏到，成為一時佳話！余詠詩從騎生涯累積19場頭馬，女將嚟講佢只排在蔣嘉琦之後，之後循馬房工作發展，第一個亦係最長時間嘅馬房(7年)就係苗廐，做事出名嚴格嘅苗禮德，連馬王「雄心威龍」都有畀佢操，就知有幾重視呢位女副練....大家再睇吓啲相，平時COOL爆嘅老苗，成日對住余詠詩笑架，可想而知佢對詩妹有幾滿意喇，當然...老苗對女仔可能都係好啲嘅！
講番正經嘢，之前好多馬迷都睇好余詠詩能夠成為香港首位女練馬師，可惜自從17年詩妹「跟錯大佬」跟麥菲文，就出現高低跌墮。老麥玩咗短短一季多返澳後，詩妹就降級做大摩第二副練、之後升番副練、但之後過檔賀賢度又落一級，到新馬季佢肯北上，詩妹終於做番副練喇，希望呢段小轉折唔會影響到佢做女練馬師嘅壯志雄心喇。詩妹，一於學你以前拍TVB套戲名咁，繼續《勇往直前》，叻多次畀大家睇！