翠河超捷確叻夠晒贏....馬會主席養過嘅神馬！

東網電視

新上任的馬會主席陳南祿先生，名下現役馬「天地同心」剛季終在莫雷拉胯下開齋，呢匹徐廐馬當日靠雷神攝靚位，直路拉出外欄一衝過晒，雖然當日陳南祿仍未坐正，但有馬贏一定開心喇，數番其實歷任主席絕大部份都有養馬，今日就重溫一人一隻主席馬、每位主席名氣最大嗰隻！

沈弼(81至86年)

馬會前主席及滙豐前大班沈弼，養過「月光光」、「寶得」、「好晒勒」、「醒呀」、「神氈」、「利是」、「大炮」、「金飯碗」、「好彩」、「飲勝」等馬，當中配售馬「金飯碗」雖然唔係高班材，卻贏過五場六班賽，一生都執到6W噃。

麥蘊利(89至91年)

在港養過五匹馬，表現最出色有蘭尼訓練嘅五捷馬「夠晒贏」，當年在白禮楝胯下一季五捷，最後一仗贏亞視盃在最外欄湧過「意利高」，季尾再在女皇盃與「翠河」同「及時而出」兩大馬王同闖三甲。

張奧偉（86至89年）及夏佳理(02至06年)

兩位當年曾拍住合夥多駒，其中最最最出名，一定係家喻戶曉嘅一代馬王「翠河」，曾在巫斯義胯下勇奪91年香港邀請賽，香港史上首匹遠征馬、唯一一匹三冠馬王，三屆香港馬王，一生16捷...履歷厚過黃頁呀~至於之後夏佳理個人亦有「駿河」爆冷捧走女皇盃。

施偉賢(93至96年)

又係唔使多講，施偉賢名下嘅「確叻」係香港賽馬轉職業化後，首匹贏打吡嘅雌馬，第二匹先係希斯「勝威旺」，尚有一匹「確叻寶」都曾經八捷。

黃頌顯(96至98年)

黃頌顯近年多用「趣」字命名，但大家記唔記得賓康時代匹「狀元星」？呢匹黃頌顯愛駒，成身栗色超靚仔，來自美國嘅佢更係泥地能手，在港締六捷！

李福深(98至02年)

要數李福深愛駒，「巴沙」、「聖捷」馬迷一定有印象，但最突出一定係11捷嘅老摩佳駟「超捷」，雖然未做過馬王，但與「足球」、「同德」合演多場經典戰役，紅色超搶眼綵衣再加上栗色靚仔台型，堅無得輸！佢仲要係雄馬，多年後有囝囝「超捷二世」運港！

陳祖澤（06至10年）

陳祖澤個人名義養馬量唔算少，但大部份如「真功夫」、「交得準」都唔叻，拉頭馬次數最多，已經係執3W的「好運得福」。

施文信(10至14年)

名下馬以「高原」命名，較突出有三捷馬Woodman子嗣「高原舞人」，合夥五捷馬「光芒再現」未出賽施文信已退股。

葉錫安(14至18年)

葉主席個人名義最出色一駒，係來自南非的「獨步青雲」，最高成就出戰打吡跑季軍。至於九十年代葉生有份嘅孖士打團體馬、評逾110分的千四王「馬英雄」，亦係當年大摩得意之作。

周永健（18至20年)

周永健名下馬多以「感」字命名，「翱感」曾在一季五勝最巴閉。

on.cc東網