三奪百萬挑戰盃？神仙新季再打「奇」牌

「明駿之星」去季成為跑馬地百萬挑戰盃冠軍，練馬師蔡約翰繼前季「鄉村瑰寶」捧盃後成功冧莊，因此近季神仙喺谷戰嘅威力，真係唔可以睇小，尤其短途成績方面，更加係非同小可。

睇番廐內兩匹挑戰盃冠軍，都係以1200米性能最勁，綜觀上季蔡廐谷草成績，呢個路程的確係佢嘅撒手鐧，係佢谷戰贏馬最多途程，雖然只得6W唔算突出，但就交出19亞15季，單計呢個路程上名率，已經冠絕各倉口。

蔡神仙既然精於喺1200米專攻跑馬地百萬挑戰盃，咁新季會唔會又係照辦煮碗，相信都心中有「馬」。以佢目前三班尾、四班頂評分嘅子彈，去季尾已喺呢個路程兩戰俱亞嘅「仙履奇遇」，就最啱佢心意。

雖然「仙履奇遇」目前只得56分，首季礙於稚嫰進度未足，才有易位難贏錯覺，正如廐侶「明駿之星」到港初期，更無佳處可言，反而「仙履奇遇」短短兩仗，一早仄準谷草性能，相信來季神仙嘅腹稿，必然視其為專攻百萬挑戰盃嘅精銳。