赤兔的盧爪皇飛電 仲有飛雲騅出處係...
20200824
東網電視
更多新聞短片
中國古代名駒唔少，咁就真係啱晒，好多馬主都鐘意用嚟做馬名，一來易記二來又有典古，書卷味滲晒出嚟呀，咁多年來究竟有咩馬名係用古代神馬命名？好難列得晒出來，但盡力喇！
赤兔
「赤兔」呢個馬名大家最熟悉，為《三國志》、《三國演義》中登場的一匹紅黑毛色良馬，話明「人中呂布，馬中赤兔」，可想而知有幾犀利，呂布死後「赤兔」由關羽接手，關羽戰死「赤兔」絕食而亡，堪稱古代忠馬。題外話大家有打機玩《三國志》，騎住赤兔玩單挑，就嚟輸走都走得快啲。不過香港歷年用「赤兔」命名嘅馬，絕大部份都好水皮，早兩年方仔匹大不列顛錦標冠軍「赤兔寶駒」，兩捷已經算好！
的盧
三國另一快馬，劉備走難就係靠佢躍過檀溪保命。同名「的盧」七十年代尾有匹配售馬，而千禧年後初來香港的蔡約翰，亦有匹Success Express子嗣「的盧」，在低班六捷唔錯了。
絕影
曹操於宛城攻打張繡之時，失虎將典韋，同時亦失良駒「絕影」。話說曹操當日走佬騎呢匹快到無影嘅「絕影」衝出重圍，可惜馬兒被流矢射中眼部倒下，曹操傷心失去此匹「大宛良駒」(九十年代中的簡廐配售馬)。而沈集成現役的「追風絕影」，上季一出大勝好馬「達心星」五個幾馬位堅係快，但弊在之後長抖唔見影！
爪黃(皇)飛電
點解一講曹操、曹操就到？因為佢騎快到癲嘅「爪黃飛電」囉！「爪黃飛電」蹄似披金，飛如閃電，高大威武，三國時代與上述之赤兔、的盧、絕影齊名，而已故鋪王周南愛駒原本改名為「爪黃飛電」，可惜秘書誤寫「爪皇飛電」卻添三勝，延伸下去的「爪皇凌雨」更成為世界馬王，絕對錯有錯著。反而周南囝囝周永健，早幾年馬名撥亂反正改番「爪黃飛電」，卻以處女馬身份出局。
越影、翻羽
周穆王有八駿，據《拾遺記》中記載，一名絕地、二名翻羽、三名奔宵、而四名為越影，逐日而行。方仔近年匹「越影」五捷高班，扳近百分屬好馬之列。
獅子驄
隋文帝時，大宛獻千里馬，其鬃曳地，號曰獅子驄。徐廐早幾年匹「獅子驄」試過五連捷，不過呢匹頸唔多鬃毛，無拖地呀~
翠龍
《河東賦》注：“翠龍，穆天子所乘馬也”。「翠龍」為已故新界王劉皇發長子劉業強名下馬，兩捷曾上逾百分。
千里馬
戰國楚王命伯樂孫陽找千里馬，踏破鐵鞋嘅伯樂，在回程途中找來一匹拉著鹽車嘅瘦馬。楚王最初半信半疑，但命人細心飼養後再跨上馬背，一揚鞭快到成陣風咁，人已在百里之外，勁呀！不過早十多年告達理訓練同名「千里馬」，雖曾兩捷田草千八，但最後低到廿分出局，莫非千里馬遇唔上伯樂~
騄駬、驊騮
周穆王八駿馬。《幼學瓊林．卷四．鳥獸類》：「騄駬驊騮，良馬之號。」「騄駬」與三屆馬王「祿怡」同音，至於「驊騮勁」則是張學文三捷中短途馬。
騊駼
《山海經》北海有獸，狀如馬，名騊駼，色靑。九十年代初方祿麟馬房「騊駼」曾六捷跑馬地。
颯露紫、特勒驃
唐太宗李世民昭陵記載有六駿，是生前征戰之御驥，其中「特勒驃」、「颯露紫」均有出過同名服役馬。蘇保羅「特勒驃」多戰未勝黯然出局，至於何良美國栗色馬「颯露紫」亦僅一勝。
飛雲騅、小紅馬
「飛雲騅」唔係古代名馬，卻是金庸《神鵰俠侶》筆下的神駒、蒙古皇帝蒙哥的坐騎，就連楊過輕功都追唔到佢！現役方仔的「飛雲騅」，一樣快到痴線，谷一哩配莫雷拉，試過頭三段快到1分14秒93！至於《射鵰》郭靖匹「小紅馬」，香港服役都有兩隻，一匹為謝偉俊名下未勝馬。
其他古代名駒馬名：
玉花驄、赤驥、奔虹赤、赤龍駒、赤電(神駒)、飛越峰