【賽馬以外】亡命快步速留得後就好？呃你咋！

「快步速利後上，慢步速利放頭。」相信只要有啲專業知識，應該知呢句嘢太籠統，甚至有誤導成份。如果要正確啲咁講，筆者記得多年前睇過一位高手寫嘅文章，慢步速對擅長爆一段嘅馬有利，快步速則係測試馬匹真正實力，就以「精英大師」、「美麗傳承」兩匹擅長放頭嘅馬王為例，唔通快步速賽事真係會令呢兩隻馬非常不利咩。

如果賽事步速真係快到甩碌，兼且早段有幾隻馬一起鬥燒，突破本身極限時，前置馬散晒嘅機會係好大，咁早段留喺較後位置慳力嘅馬，自然能夠後發先至。不過，究竟係咪留得愈後，衝得愈勁？答案可以係，但留得愈後係咪愈有機會贏，真相卻並非如此。

筆者不妨搵季初兩場夠晒爭議嘅兩場極快步速賽事嚟講，開鑼日尾場二班1400米，「開心好玩」、「美麗掌聲」同埋「聚才」三隻馬早段鬥搶，第二段造20秒8極速，頭三段則是57秒72，結果佢哋入直路散晒三甲不入，由「蒙古王」後上一攻而破。

或者有人會即刻講：咁咪後上馬有利囉。不過，筆者建議大家留意嗰場分段時間同埋位置，「蒙古王」的確係後上，但當去到最後400米時，呢隻馬實際上只落後頭馬4馬位，反而季軍「輝煌星」當時就落後頭馬5-1/4馬位，結果即使後駒拉士做22秒73，快過「蒙古王」嘅末段時間22秒76，亦無補於事。至於最後400米落後頭馬6個半馬位嘅「家樂飛駒」，睇片拉士追得好，實際上只能跑第五。所以就算遇上亡命快步速，若然落後太遠，其實未必追到。

然後再講尋日第二場五班1400米，今場有三隻華將嘅馬「電子傳承」、「百寶袋」同埋「笑傲成功」早段狂搶，結果五班馬第二段做20秒92，頭三段去到57秒27，仲快過「聚才」嗰場，自然由一對後上馬「活力寶駒」及「捉金皇」包辦連贏，但睇返分段時間及位置，「活力寶駒」拉士400米落後放頭馬5-3/4馬位，而「捉金皇」足足落後8馬位，所以後駒末段造23秒21，快過「活力寶駒」嘅23秒53都係無用，一樣追唔切。

因此與其成日話要鬥末段，其實一場賽事決定勝負嘅地點，可能係喺最後400米，你究竟守係咩位置！

■山無陵