慶典盃真係美麗鬥金鎗咁簡單？！

禮拜日嗰場三級賽慶典盃，既有馬會不斷宣傳，傳媒又不斷力煲，似乎只係得「美麗傳承」同「金鎗六十」兩隻馬跑。不過，呢場始終唔係1 on 1對決，喺一場共有11駒角逐嘅賽事，究竟係咪真係呢兩隻馬單Q返咁簡單。

如果要講疑點，「美麗傳承」、「金鎗六十」都唔係無㗎，前駒今季已經8歲，兼且加盟希斯馬房首戰，究竟戰鬥力有無退化，仲係未知之數。況且仲要孭133磅，點計都係考驗嚟。至於「金鎗六十」負磅係有優勢，但最近兩課泥閘的確表現麻麻，況且抖咗一段長時間，狀態係點真係跑過先知。

既然係咁，其實同場都有啲邊線分子可以吼吓，方嘉柏嘅「與龍共舞」上季轉倉後贏4W，最後一仗喺三級賽大炒對手四個幾馬位，演出不斷進步，今次復出縮程有新鮮感，爆一段亦唔輸蝕。至於「嘉應之星」雖則上季喺慶典盃受讓廿磅都輸畀「美麗傳承」，今次只係受讓七磅，但此一時彼一時，「嘉應之星」仲可以再上，話唔定今場可以擊敗對手。