【賽馬以外】騎師好好搵？有位嘅人工隨時少過你

唔會話香港，依家全球經濟都受疫情影響，唔少大公司唔係裁員就凍薪，打工仔呢一刻真係只能頂硬上。不過，如果喺香港馬圈工作，情況就可能有啲唔同，事關今季賽事獎金再次提高，對於一眾喺香港發展嘅騎練嚟講，都叫做變相嘅另類加薪。好似依家已經有15場頭馬嘅莫雷拉，佢暫時累積獎金已經超過千二萬，即係話未計禮拜日賽事，佢今個月已經搵到超過一百萬，而潘頓嘅累積獎金亦逾900萬，即係話佢獎金收入亦有80萬左右。

莫雷拉、潘頓話晒係兩大紅人，搵錢能力自然比較驚人，但就算講緊華將一哥何澤堯，唔夠一個月累積獎金都有520萬，禮拜日仲有「金鎗六十」喺手，今個月收入肯定唔差，而只得1W嘅郭能亦有220萬獎金，就算未開齋嘅潘明輝，因為有三個第二，暫時累積獎金亦逾160萬，睇嚟做騎師，收入真係唔係問題，似乎幾好搵。

不過，如果再睇真啲，原來今季有位騎師一蚊獎金都冇落袋，就係目前最資深嘅本地薑黎海榮，呢位36歲嘅華將暫時出賽16次，全部輸晒之餘，甚至第五名都未跑過，因此依家佢嘅所贏獎金數目係零。當然騎師上陣係有策騎費2300元，但有1000蚊要畀馬會，所以黎海榮暫時收入係$20800，而佢禮拜日仲有4匹坐騎，如果繼續冇前五名，佢今個月應該有26000蚊，隨時少過唔少讀者啦。

■山無陵