金鎗六十不再發夢 余健誠力掩鋒芒

聽日沙田日馬，馬迷最緊張當然係「金鎗六十」同「美麗傳承」的世紀之戰，兩匹佳駟歷來首度交鋒，角逐第八場國際三級賽慶典盃(草地1400米)，參戰馬有十一匹，明午四時卅五分上演，不妨拭目以待。

需知呢匹四歲三冠王試閘向來唔突出，惟對上一次的一課泥閘包尾而回，輸廿二個半馬位，相當離譜，都咪話唔驚，惟何澤堯課後話匹馬試閘不嬲都係咁，同出賽係兩隻馬，向馬迷大派定心丸。

今朝「金鎗六十」五點鐘就現身晨課，作賽前最後一課備戰，由主操的策騎員余健誠在內圈出試時，隻馬起步冇耐就自己識飊，角逐意識高漲，鞍上人為防走火，立即踩實腳踏，身驅向後挨，狀似坐飛機櫈，小啲力水都唔掂，似想提示馬匹繼續做「忍」者噃！