韋達+潘頓 真係天作之合？

韋達同潘頓，曾經係競爭對手，亦係潘頓打破韋達嘅13屆冠軍騎師皇朝。不過，韋達依家貴為練馬師，潘頓自然希望可以得到呢位昔日宿敵支持，佢甚至喺知道韋達獲發牌開倉後，曾經講笑話自己極有可能幫佢攞到從練首W。

不過，經過一年多嘅時間，潘頓同埋韋達呢對騎練組合嘅頭馬數目竟然係0。其實就算講合作次數，潘頓只係騎過12次韋廐馬，但佢已經盡力交功課，事關成績係6個亞軍，如果講入Q率都有50%，卻始終同頭馬無緣，好似尋日嗰匹「全才」，明明已經全面取勝機會，點知都係第二。

嚟到今個禮拜日，韋達就將「天作之合」交畀潘頓執韁，呢匹3歲英國自購馬上次跑田草1200米後上得第六名，今次增程跑1400米部署合理，換潘頓出擊都係想贏，睇吓呢兩位冠軍能否破吓數據，合作贏番次啦。