有份爭8345萬 祈普敦騎舊年亞軍闖珠峰

總獎金高達1500萬澳元(約8345萬港元)嘅珠穆朗瑪峰錦標，將於今個月17號舉行，當然係唔少騎師夢寐以求嘅大賽，話晒係全球獎金最高草地賽事，但出賽名額只得12駒，要搵到坐騎跑呢場1200米短途賽，並唔容易。

不過，曾經來港發展嘅澳洲好手祈普敦，即使近期連番喺一級賽跑第二，但佢日前終於收到好消息，就係代表古摩亞陣營嘅「聖雅勒徑」(Santa Ana Lane)，幕後已決定將此駒交畀佢執韁角逐珠穆朗瑪峰錦標，亦係佢首次參與呢項賽事。

雖然「聖雅勒徑」去年來港角逐主席短途獎只得第四名，但此駒返回澳洲後，去年出戰珠穆朗瑪峰錦標則取得亞軍，今次祈普敦可以為呢匹短途好手效力，睇吓能否交出好成績？