兩個招呼都唔打 究竟方仔潘頓搞乜？

方嘉柏同潘頓呢對昔日好拍檔，近排突然由糖黐豆變成水溝油，自9月23日「金如意」開始起，已經有差唔多兩個月冇合作，嚟緊周三晚，方仔7匹正選都好大機會全部唔用潘頓，而潘頓都有晒其他坐騎了，再問埋日日落晨操嘅記者，佢哋都話朝早完全唔見潘、方兩個行埋傾計寒暄，真係各有各搵食了，究竟兩個咩事搞到咁？

最似層層嘅傳聞，當然係方仔今季決意爭冠，所以想搵影子主帥埋班，好讓搏殺心無旁騖唔使下下搵配搭，但弊在潘頓唔制，佢係都要搵外線坐騎，情況咪發展到宜家咁囉...其實早一個月潘頓接受訪問時都透露，唔想接死一個馬房嘅馬、而係希望線路可以八面玲瓏啲...咁重整兩個故仔二合為一，講嘅嘢都好肳合噃...

不過又咁講，方仔重情重義唔會記仇，潘頓亦都係一等一嘅世界仔，可能兩個好快又冇事行返埋一齊，潘頓遲啲埋牙要同雷神爭冠，唔通真係眼尾都唔望柏廐馬咩，再諗返老苗夠成日嬲騎師...最終咪又用番雷神史卓豐...要好似蔡約翰、韋達咁長期互當透明，響馬圈好罕見！