「包裝」王牌率先登場 希斯透露國際賽日打孖上

2020年11月27日 11:20
東網電視
更多新聞短片
被譽為今季進軍四歲馬大賽嘅王牌,大衛希斯旗下「包裝永勝」將會響星期日正式登場,出戰尾場嘅二班1400米,相信馬迷熱切期待,睇吓佢會跑成點,但幕後以至希斯同潘頓,就真係高度重視,就係不爭事實,今季幾次試閘,都見李家三少李文斌到場,而且操完例牌見到同騎練一堆人密斟鏡頭。
其實今季希斯返港開倉,李文斌都好撐場,畢竟響澳洲合作,名下「精彩鬥士」及「哈霖」響希斯訓練下,一再揚威G1大賽,番到嚟香港,當然以行動支持,兩匹「包裝」系PP,都係擺明想幫希斯省招牌。
「包裝永勝」今次雖然初出,不過希斯早已有晒部署,除咗安排周日首戰外,下一場都諗定響12月13日嘅國際賽日子再跑,屆時就會增程跑1600米,唔單止咁,另一匹澳洲兩戰全勝嘅「包裝太保」,亦都會響國際賽當日報名出戰,出戰三班1200米,而響澳洲主理呢匹馬嘅騎師韋米高,對呢匹馬都有很高評價,絕對係有晉身級制賽潛力嘅良駒。
兩匹「包裝」系明日之星,未跑都已經成為矚目焦點,睇吓「包裝永勝」今期能否打響名堂,然後夾埋「包裝太保」響國際賽當日,再嚟個一炮雙響。