15戰14W 金鎗六十仲有咩紀錄可以破？

面對嚴峻疫情，香港國際賽尋日仍能順利完成，確實非常難得。即使4場G1，海外馬匹以3比1擊敗本地精英，但馬迷應該好高興見證新王者誕生，就係勇奪香港一哩錦標嘅「金鎗六十」，事關呢匹上季4歲王，已經跨季連贏11W，在港15戰累積14場勝仗，只係輸過1次。事實上，「金鎗六十」累積頭馬數目已經超過「雄心威龍」及「爆冷」2匹傳奇馬王，將會力追累積16W嘅「好爸爸」同埋「翠河」。

毫無疑問，「金鎗六十」依家嘅成就，幾乎肯定會寫入香港賽馬歷史。究竟呢一刻，佢仲有機會破咩紀錄呢？不妨同大家數數：

1. 香港職業賽馬史上頭馬最多賽駒：目前呢個紀錄由「永勝」、「精英大師」同埋「美麗傳承」共同保持，呢3匹傳奇馬王都係累積18W。睇番「金鎗六十」只係5歲跑咗15場就有14W，但佢最犀利嘅地方，就係今季幾乎每次均行過對手，睇番尋日演出，相信短期內喺香港跑1600米，應該搵唔到對手，所以下半季嘅董事盃，甚至G2主席錦標，或者冠軍一哩賽，肯定係囊中物。即使呂健威透露或會讓「金鎗六十」挑戰香港金盃，但既然佢係打吡冠軍，又睇埋尋日主隊馬匹喺香港盃嘅演出，而「時時精綵」跑2000米唔算首本，所以「金鎗六十」係下半場多添4W，追平「永勝」、「精英大師」同埋「美麗傳承」，好似唔係咁難吧。

2. 繼「翠河」之後成為另一匹三冠馬王：香港賽馬史上，只得「翠河」試過包辦董事盃、香港金盃同埋遮打盃，成為三冠馬王。不過，「金鎗六十」亦有權繼4歲三冠王後，今季問鼎真正嘅三冠王。頭先都有講，「金鎗六十」下半季嘅目標應該係董事盃同埋香港金盃，正正係三冠大賽頭2關賽事，如果順利贏晒，只係爭2400米G1遮打盃。或者大家擔心「金鎗六十」有無長力，但一匹留放自如嘅馬王，似乎問題不大，況且幕後話明今季唔遠征，所以如果真係贏晒董事盃、香港金盃，點解唔試吓挑戰三冠馬王。

3. 挑戰「精英大師」連贏17場紀錄：傳奇短途馬王「精英大師」出道頭17次出賽全勝，寫下連勝17場嘅壯舉，但「金鎗六十」亦已經連勝11W，如果今季保持不敗，有機會將連勝紀錄推至15W。因此只要下季6歲仍保持水準，一樣有機會打破呢個紀錄。