勤有功！神鵰俠侶返國密密跑！

通常英國草地馬季收鑼，呢段歇冬期都會安排每個星期跑全天候跑道賽事，直至明年4月初，再由新一季草地馬季接棒。呢類細雞嘢賽事，大牌騎師如戴圖理、莫雅之流，都寧願休息，甚少參與，最多喺新季開鑼前，先至會見佢哋跑番三幾個回合熱吓身。

不過，年輕一輩如杜苑欣同埋男友馬昆，一於密密跑當磨煉騎技。爆紅嘅杜苑欣，甚至喺香港跑完國際騎師錦標賽已經急住走，先去法國一趙跑表列賽，然後香港舉行國際賽當日，佢就喺嶺飛馬場復工兼贏馬。而佢男友馬昆亦喺國際賽後急住離港，翌日已經喺金頓馬場贏馬，連埋尋日喺溫咸頓馬場再贏，真係勤力過隻牛。。

畢竟勤有功，兩人咁積極，現階段喺全天候冠軍騎師挑戰賽中，成績唔曳，馬昆與杜苑欣分別以24W同埋22W，緊咬頭二位嘅金誠剛(26W)同埋杜俊誠(25W)，分列3、4位，由於要鬥到明年4月2日，分分鐘可以後來居上。