2020大豐收 杜苑欣獲BBC年度體壇風雲人物季軍

每年12月英國廣播公司(BBC)都會舉行年度風雲人物頒獎典禮，今年雖受疫情衝擊，但仍然有唔少運動員歷盡艱辛，繼續為體壇獻出一分力。

今年BBC年度體壇風雲人物頒獎典禮已經圓滿舉行，馬壇方面，今年有英國女將杜苑欣得獎，佢亦係唯一女性入選，最後獲得季軍，而冠軍由7屆F1冠軍咸美頓奪得，亞軍就係英超冠軍利物浦隊長軒達臣，杜苑欣男友馬昆亦陪同佢出席頒獎禮。

杜苑欣喺2020年認真大豐收，今年頭馬數字除咗破英國平地女騎師最高紀錄之外，亦喺英國冠軍短途錦標中首次摘下G1。今個月初，杜苑欣更遠道而來香港參與國際騎師錦標賽，策騎「人和家興」贏出其中一關騎師賽，成為首位贏出國際騎師錦標賽嘅女騎師。