【蹄聲妙影】美麗傳承榮休 冇主題曲點得

每次馬會舉行馬匹榮休儀式，又一再證明英雄總有退幕嘅一日。嚟緊周日賽前輪到「美麗傳承」接受現場人士，甚至港人嘅祝福，呢匹8歲佳駟贏得總獎金超過1億，係香港歷來累積獎金最多嘅賽駒，以8個G1，合共18W完成其競賽生涯，威水史詳情唔講咁多，篇幅有限。

東星係攝記關係，有幸曾現場見證多匹「6星馬」榮休，記憶中有遠至「電子麒麟」、「爆冷」、「好爸爸」、「精英大師」、「牛精福星」、「雄心威龍」，同出紀念郵票嘅「爪皇凌雨」等，近年有「威爾頓」、「加州萬里」、「步步友」、「友瑩格」，同埋東星兩度喺新加坡採訪，都能勝出克蘭芝短途錦標嘅「天久」。

其中，「精英大師」當年榮休都算誇張，有首由Hans Ebert作嘅主題曲叫《we all stand together》，中文版叫《精英》，由林夕作詞，鄭中基主唱，嗰時東星喺K房都有點嚟唱，旋律優美，依家唱番都唔覺Out，大家可上網摷番嚟聽，唔知馬會又會唔會畀個驚喜大家，周日大銀幕播首叫《美麗》嘅KTV呢？

初步提供:

第1場 8「知道再勝」

第3場 5「富存大師」

■東星