希斯同潘頓齊心同行

截至上個賽馬日，希斯暫時取得14W，成績未如外界預期，但打開分廐表一望，就會發現希廐非常多E布新兵，嚟到4月，練者逐漸派出有睇頭嘅E布精兵，就好似早前「包裝大獎」，初出一仗已追勢甚強，令到唔少馬迷都期待佢再出表現。

周一沙田日賽，第4場四班1200米草地，希廐就有一匹「齊心同行」初出。呢匹「齊心同行」分別喺從化同香港試咗合共4課閘，喺沙田2課試閘都係由潘頓主理，當中埋門一課1200米泥閘，以擺前走方式僅負「錶之未來」4分3個馬位，走勢悅目，而潘頓今次都應承希斯初出策騎此駒。希斯表示，今場「齊心同行」抽11檔起步無疑係有難度，但只要出閘順利，展現出天生速度，佢有權跑得接近走勢。