護級仲有無希望 贏埋呢場先講！

鄭俊偉尋晚終於靠「齊齊友福」攞到佢今季谷草首W，仲要喺佢在港第300場勝仗，固然意義重大，可惜亦只係佢季內第6W，換言之米高哥仲爭10場頭馬先可以上岸，難度真係非常高。不過，尋晚問到鄭俊偉覺唔覺得自己有無可能畢業時，佢話仲有啲機會贏夠16場，事關廐內有啲質新馬開始冒起，當然一切只能盡力而為，而佢亦唔會為今季嘅成績搵藉口。

當然講係無用，最緊要係做，一場一場咁贏，就有機會完成目標。好似周日沙田賽事，鄭俊偉獨出一匹「為善聚樂」，隨時可以達成100%勝出率。呢匹7歲愛爾蘭馬漸漸跑起狀態，近3仗兩度有獎金收，2月中角逐五班田草2000米跑第3名，當時抽不利嘅12檔，今次再跑同程改用法國好手巴度，兼且抽4檔好位，有望扳回一仗。