舊年爆大冷入Q 馬昆今屆葉森打吡希望係佢！

今屆車士打銀瓶片段：

https://bit.ly/3xKSoqp　

英國葉森打吡係每位騎師夢寐以求嘅大賽，當地年青好手馬昆去年喺呢場一級賽，夥拍包義定馬房嘅大冷門「觀測衛星」(Khalifa Sat)取得亞軍，究竟今年佢有無機會更進一步呢？答案梗係有啦。事關馬昆、包義定同埋馬主Ahmad Al Shaikh呢個鐵三角組合又有佳作，尋晚喺車士打馬場舉行嘅2500米G3車士打銀瓶，佢哋憑Youth Spirit以近兩馬位之先擊敗莫雅策騎嘅古摩亞賽駒Sandhurst，贏出呢場重要嘅葉森打吡前嘅熱身賽。

父線出自葉森打吡冠軍「帝皇城堡」嘅Youth Spirit，其實之前只係贏過一場普通賽事，今次復出跑表列賽亦只得第4名，估唔到今次大幅增程立即贏馬，馬昆都對馬兒演出感到意外，同時證明此匹3歲馬長力充沛，有能力應付2400米嘅葉森打吡。

其實過往有唔少馬匹喺車士打銀瓶交出成績後於葉森打吡有好表現，就如2013年「世界霸主」就一口氣贏晒呢兩場賽事，因此Youth Spirit贏出今屆葉森打吡嘅賠率，亦由原本嘅101倍急跌至26倍。